ស្វីស៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានជំរុញពលរដ្ឋដែលធ្វើការឃោសនាបោះឆ្នោតរក្សាភាពថ្លៃថ្នូរកុំបញ្ចេញចរិតគំរាមកំហែងដល់គណបក្សដទៃ ទោះបីជាពាក្យសម្ដីក្ដី ឬកាយវិការក្ដី។ សម្ដេចជំរុញឱ្យប្រើប្រាស់ការយកនយោបាយមកប្រកួតប្រជែងវិញ។ 

ក្នុងពេលដែលកម្ពុជាកំពុងបើកយុទ្ធនាការឃោសនាបោះឆ្នោតចាប់ពីថ្ងៃទី២១ រហូតដល់ថ្ងៃទី៣ ខែមិថុនា សម្ដេចតេជោ ហ៊ុន សែន បានថ្លែងពីទីក្រុងដាវ៉ូស ប្រទេសស្វីស ដោយជំរុញដល់គណបក្សនយោបាយមានភាពចាស់ទុំធ្វើនយោបាយប្រើប្រាស់កម្មវិធីនយោបាយជាគោល។ 

យុទ្ធនាការឃោសនាបោះឆ្នោតមានរយៈពេល ១៤ថ្ងៃ ចាប់ពីថ្ងៃទី២១ ខែឧសភា ដល់ថ្ងៃទី៣ ខែមិថុនា គណបក្សនយោបាយនីមួយៗ អាចធ្វើការជួបជុំ ឬការហែក្បួន ព្យុហយាត្រាដោយថ្មើរជើងឬជាក្បូនយានយន្ត ចែកខិតបណ្ណ លើកបដា ប្រើឧបករណ៍បំពងសំឡេងចាក់ផ្សាយវីដេអូជាដើម ដើម្បីផ្សព្វផ្សាយពីកម្មវិធីនយោបាយរបស់ខ្លួនស្វែងរកការគាំទ្រពីប្រជាពលរដ្ឋដែលជាអ្នកបោះឆ្នោតដែលធ្វើឡើងនៅរៀងរាល់ ៥ឆ្នាំម្តង។            

អ្នកនាំពាក្យគណកម្មាធិការជាតិរៀបចំការបោះឆ្នោតលោក ហង្ស ពុទ្ធា បានប្រាប់ EAC News នៅថ្ងៃដំបូងនៃយុទ្ធនាការឃោសនាបោះឆ្នោតថា ការឃោសនាបោះឆ្នោតថ្ងៃដំបូងនេះបានប្រព្រឹត្តិទៅដោយរលូន មានអ្នកចូលរួមច្រើន មានការសហការគ្នាល្អជាមួយអាជ្ញាធរមូលដ្ឋាន និងគ្មានហិង្សា ដែលបង្ហាញពីភាពចាស់ទុំរបស់គណបក្សនយោបាយនៅកម្ពុជា។

លោកថា៖ «អញ្ចឹងការសន្និដ្ឋានដំបូងដែល គ.ជ.ប មិនទទួលបានបណ្ដឹង ឬក៏បញ្ហាអសកម្មដែលកើតមាន ដែលយើងអាចសន្និដ្ឋានបានថា ថ្ងៃដំបូងនេះគឺប្រព្រឹត្តិទៅដោយមានភាពល្អប្រសើរគណបក្សនយោបាយមានភាពចាស់ទុំ ហើយក៏សង្ឃឹមថានេះគឺជាការលើកទឹកចិត្តដល់ប្រជាពលរដ្ឋសម្រាប់ការចេញទៅបោះឆ្នោតផងដែរ»។      

ការបោះឆ្នោតជ្រើសរើសសមាជិកក្រុមប្រឹក្សាឃុំ/សង្កាត់អាណត្តិទី៥ នឹងត្រូវធ្វើឡើងនៅថ្ងៃទី៥ ខែមិថុនាខាងមុខ ដោយមានគណបក្សនយោបាយចំនួន ១៧ចូលរួម ដែលនឹងដណ្តើមយកកៅអីក្នុងតំណែងជាសមាជិកក្រុមប្រឹក្សាឃុំ/សង្កាត់ នៅទូទាំងប្រទេសសរុបចំនួន ១១ ៦២២កៅអី ក្នុងចំណោមឃុំ/សង្កាត់ចំនួន ១ ៦៥២ ខណៈប្រជាពលរដ្ឋមានឈ្មោះក្នុងបញ្ជីបោះឆ្នោតប្រមាណជាង ៩លាន ២សែននាក់៕